有冇发现一个规律：
喺广州长大嘅朋友仔
每当见到有人翘住手转圈，就会习惯性哼出
“氹氹转—菊花园—炒米饼—糯米圆—”
用四个字概括起身就係
潜移默化！
对于好多广州人来讲
欢乐嘅童年一定唔少得呢D朗朗上口嘅童谣
《月光光》《肥仔个头》《鸡公仔》……
呢D陪伴我地成长嘅粤语童谣
你仲记得几多？
鸡公仔，尾弯弯，做人呢点可以怕艰难
清早起床要返学去，执齐啲书本啊上学堂
一分耕耘自有一分收获
懒惰去做人呀，又点会有所成啊！
鸡公仔，尾婆娑，三岁嘅孩童学唱歌
阿哥佢听教咯，妈就开心哂咯
阿哥佢唔听话，妈就唔安乐
噢……
鸡公仔，尾弯弯，做人呢当然要有精神
清早起床有好习惯，经常都温书啊要学勤
一分耕耘自有一分收获
懒惰去做人呀，又点会有所成啊！
《鸡公仔》有好多版本嘅歌词，唔同时期就有唔同嘅“鸡公仔”：最早嘅“鸡公仔”歌词反映嘅係旧时粤地女子旧婚俗嘅陋习（张德兰版本）；多数广州人印象中嘅就係当代作品，教育细路仔勤奋听教（上文文字歌词）。
印象中阿妈都会唱呢首歌氹我地训教，係属于广州人嘅摇篮曲。朗朗上口，记得上句一定记得下句，以前啊嫲最中意唱呢首歌来氹孙。
睇龙船，炒米饼，糯米团，呢D就係印象中嘅端午节。但係小朋友就宁愿睇鸡仔都唔去凑热闹，就係我地嘅童年。
几乎每个小朋友都识唱嘅广府童谣，以前每逢水浸街，一定担住遮出街玩水，玩到成身都湿晒，落雨真係无咩好惊。
肥仔个头,大过五层楼
肥仔只手,细过荷兰豆
肥仔个PET PET屙豆豆
真怪诞啊又有趣，你望望公园里，
黄狗爸爸羊妈妈，来猜来猜哟
一支竹仔会易折弯，几支竹一扎断折难。
孤掌莫持倚，团结方可干大事。
除咗以上可以唱成歌仔嘅童谣
仲有好多简短但係同样朗朗上口嘅
粤语童谣
简单好记，节奏性强
你又记唔记得？
☀大笨象，揸支枪☀
大笨象，揸支枪
去打仗，打完仗
返嚟食碗辣椒酱
隔篱屋企烧炮仗
问你响唔响
唔响升你两巴掌
☀肥佬肥揗揗☀
肥佬肥揗揗
买舊猪肉去拜神
行到半路屎窟痕
返到屋企瓜老衬
☀点虫虫☀
点虫虫，虫虫飞，飞到荔枝基。
荔枝熟，摘满屋，屋满红，
伴住个细蚊公。
☀猜呈寻☀
呈寻剪，呈寻包
呈寻糯米叉烧包
老鼠唔食炸药包
执到粮票买面包
☀嗳姑乖，嗳姑大☀
嗳姑乖，嗳姑大，
嗳大个姑仔嫁后街。
后街有鲜鱼鲜肉卖，
又有红皮屐仔绣花鞋。
又有鲜花戴，
戴又戴唔晒，
丢落床头畀老鼠拉。
一拉拉到大新街。
大人执到笑眯眯，
细路执到当银牌。
☀打开蚊帐☀
打开蚊帐，打开蚊帐，
有只蚊，有只蚊，
快啲攞把扇嚟，快啲攞把扇嚟，
泼走佢，泼走佢。
打开蚊帐，打开蚊帐，
有只猫，有只猫，
快啲攞支竹嚟，快啲攞支竹嚟，
吓走佢，吓走佢。
☀卖懒☀
(一)
卖懒，卖懒，
卖到年卅晚，
人懒我唔懒。
(二)
卖懒，卖懒，卖到年卅晚；
卖穷，卖穷，卖畀猪婆龙；
卖衰，卖衰，卖畀大头龟。
☀河边有只羊☀
河边有只羊，羊边有只象
象边有只马骝精，好似你咁样
马骝精，马骝精，喜欢扎扎跳
又爬树，又落地，天天欢嬉戏
路边有只牛，牛边有只雀
雀边有只小青蛙，好似佢咁样
小青蛙，小青蛙，喜欢扎扎跳
扎扎跳，跳跳跳 ，天天欢嬉戏
☀咕碌咕碌☀
咕碌咕碌一
咕碌咕碌二
咕碌咕碌三
准备开炮打敌人！
☀点指兵兵☀
点指兵兵，点着谁人做大兵
点指贼贼，点着谁人做大贼
果阵时仲未识Twins
果阵时TFboys仲未出世
呢D童谣就係我地童年最好听嘅流行曲
你细个仲听过边D粤语童谣
留言讲俾小编知啦！！
特别声明！本文中的图片来自网络，版权归原创者所有！感谢作者分享，如有侵权，请通知删除！】
友情链接